Mu Rwanda, bwa mbere mu mateka, hagejejwe uburyo bwo kurebamo filimi muri 3 Dimension ndetse na 5 Dimension, bwatangijwe na Century Cinema.
Ubu buryo bwo kureba filimi muri 5 Dimension butuma umuntu areba filimi akiyumva nk’uyirimo hifashishijwe amataratara (lunettes/Glasses) yabugenewe, bitandukanye n’uburyo dusanzwe tuyireba kuri televisiyo na za mudasobwa.
Charles Gacigua, Umuyobozi w’Ibikorwa muri Century Cinema akaba n’inzobere mu byo kwerekana filimi muri rusange, by’umwihariko izikoze muri ubu buryo bwa 5D, avuga ko Century Cinema izanye ubu buryo mu rwego rwo kugeza ku banyarwanda ibyiza bivuye nahandi.
Charles Gacigua, Umuyobozi wa Century Cinema yadutangaruje ko “Century Cinema” ari inzu yerekana filimi, icyo turi kugerageza gukora ni ugufasha Abanyarwanda kujyana n’igihe tugezemo tubazanira filimi mu buryo bwemewe kandi tukazibagerezaho mugihe zikiva Hollywood.”
Yakomeje avuga ati "Njyewe aho nturuka muri Kenya, abantu baho bamenyereye umuco wo kurebera filimi mu mazu yabugenewe bakayabonera ku gihe agishyirwa hanze, kandi ho 5D ihamaze igihe ugereranyije no mu Rwanda.”
ITANDUKANIRO RIRI HAGATI YA 3D, NA 5D.
Icyo 3D irusha uburyo busanzwe turebamo filimi ni uko ureba muri ubu buryo abasha kubona ibintu muri filimi bimwegereye kurushaho akiyumva amenze nk’uyirimo, ndetse n’amajwi akumvikana mu buryo bwiza kurushaho.
5D yo si filimi mu buryo busanzwe, nk’uko Charles Gacigua abisobanura,ahubwo ni uduce duto twa Video (Video clips) tw’iminota itanu kugeza ku moinota umunani, aho uwambaye amataratara akareba bitewe n’intebe zabugenewe bicaramo, ho babasha kugira ibyiyumviro bimeze nkaho bari mubyo bareba.
“Muri 3D ureba amashusho gusa ukumva umeze nk’uyarimo uyegereye cyane. Naho muri 5D hiyongeraho kumva buri kimwe uri kubona kikubaho ubwawe, nk’aho ubonye imodoka igenda uba umeze nk’uyigendamo niba hari icyo ugonze ukabyumva, wakata ikona intebe wicayemo igahengama nkaho ukoze icyo gikorwa cyo gukata wazamuka ikegama nk’uzamuka, wagera ahameneka amazi ukumva ameze nk’akugeraho nawe.”
Century Cinema ibaye iya mbere mu kugeza mu Rwanda uburyo bwo kureba filimi muri 3D na 5D ndetse n’uburyo busanzwe hakoreshejwe Projectors/Projecteurs nini, ibi byose bikazajya bikorerwa mu mazu yabugenewe aho aherereye mu nyubako "Kigali City Tower".
By’umwihariko kandi bitewe n’ukuntu ifite ibyumba bigera kuri bitatu byerekanirwamo filimi, Century Cinema ifite ubushobozi bwo kujya yerekana filimi zirenga ebyiri icyarimwe.
Ubusanzwe aherekanirwaga sinema mu Rwanda hari hamenyerewe ni mu gace ka Nyamirambo ahari amazu atatu yerekanirwamo filimi arimo Cine Elmay na Cine Star.
AGASHYA CENTURY CINEMA IZANYE
Charles Gacigua avuga ko atazi uburyo Cinema mu Rwanda zerekanwaga, ariko we yizera ko aribo bambere bazanye uburyo buri ku rwego ruhambaye kurusha izindi ziri mu Rwanda.
Agira ati : “Sinzi ibyari bisanzwe hano mbere ariko nizeye ko bitari ku rwego ruhambaye nk’uko biri muri Afurika y’Epfo cyangwa Kenya, kuko iyo bihaba ntitwari bugorwe no kubona uburenganzira bwo kwerekana filimi dukuye i Hollywood bitugoye, ngo bidufate ukwezi n’igice kose.”
“Agashya tuzanye ni uko tuzajya twerekanira filimi nshya ku gihe kandi tubifitiye uburenganzira.”
Gacigua avuga ko abashinzwe gukwirakwiza filimi (Distributors) batari bafite uburenganzira bwo kugeza filimi mu Rwanda, kuko nta bashinzwe kuzigaragariza abantu (exhibitors) bemewe bari bahari nka Century Cinema.
Century Cinema iteganya gutangira kwerekana filimi zabo tariki ya 10 z’uku kwezi kwa gatanu, n’ubwo ubundi yakabaye yaratangiye tariki ya gatatu ubwo hasohokaga filimi ya Ironman 3 mu buryo bwa 3D.
UBURYO CENTURY CINEMA IZAJYA IKORAMO
Century Cinema ifite ibyumba bitatu byo kwerekaniramo filimi, hakurikijwe urwego rwa filimi zerekanirwamo n’ubushobozi bw’abantu bashobora kwicaramo, abantu bakaba bazajya bareba filimi mu buryo butandukanye rimwe na rimwe hakurikijwe urwego filimi irimo n’icyiciro cy’ubukure abagenewe kureba filimi runaka barimo.
Gacigua avuga ko hari icyumba kicazwamo abantu 334, icyicaza abantu 129, hamwe n’ikijyamo abantu 70.
Kuba rero bafite ibyumba n’ibikoresho byabugenewe bihagije bizatuma hazashobora kuba hakerekanwa filimi zitandukanye icyarimwe, abana bakerekwa izabagenewe n’abakuru bakerekwa izabo zabagenewe.
Filimi zizajya zerekanirwa muri Century Cinema hazaba higanjemo izakorewe Hollywood muri Leta Zunze Ubumwe z’Amerika, naho izo mu Rwanda nazo zikaba zizabasha kwerekanwa ni haramuka habayeho kubisabwa n’abakiriya ariko zo zikerekanwa mu buryo busanzwe bwa 2D kuko zo byasaba ko zoherezwa gukorerwa Hollywood kugira ngo zigere ku rwego rwa 3D
Ibiciro ku kureba filimi bigendana n’urwego filimi irimo.
Filimi iri mu rwego rwa 2D ni ukuvuga filimi zerekanwa mu buryo busanzwe tumenyereye hifashishijwe projecteur/projector, izajya yerekanwa ku mafaranga y’u Rwanda 3500, iri mu rwego rwa 3D izajya yerekanirwa ku mafaranga 4500, naho iziri kurwego rwa 5D zireberwe ku mafaranga 5000.
Amateka ya Cinema mu buryo bwa 3D
Filimi ya mbere yerekanwe ku buryo bwemewe mu buryo bwa 3D mu mateka ni iyitwa “The Power of love yerekaniwe i Los Angeles muri Leta Zunze Ubumwe za Amerika tariki ya 27 Nzeri 1922.
Gufata amashusho yo mu rwego rwa 3D byabayeho bwa mbere mu 1894 bikozwe n’umugabo witwaga William Friese Greene w’Umwongereza.